Endurgreiðslur og vöruskil

1. Finndu pöntunina

1. Skráðu þig inn á stjórnborðið.
2. Farðu í WooCommerce > Orders (Pantanir).
3. Smelltu á pöntunina sem á að endurgreiða til að opna hana.

2. Hefja endurgreiðslu (Refund)

Skrollaðu niður að vörulistanum í pöntuninni (fyrir neðan heimilisfangið). Þar sérðu lista yfir allar vörur sem voru keyptar.

Neðst vinstra megin í þessum kassa er hnappur sem heitir „Refund“ (Endurgreiðsla). Þegar þú smellir á hann breytist útlitið og birtast nýir reitir fyrir magn, upphæð og ástæðu.

3. Velja vörur og upphæð

Nú tiltekurðu nákvæmlega hvað á að endurgreiða.

• Magn (Qty) – ef kúnninn skilar 1 stk af 2, skrifarðu 1 í reitinn við viðkomandi vöru. Kerfið reiknar upphæðina sjálfkrafa.
• Refund shipping (Endurgreiða sendingarkostnað) – skrfaðu upphæð í „Shipping“-reitinn neðst ef þú ætlar líka að endurgreiða sendinguna.
• Reason (Ástæða) – valfrjáls. Gott að skrá t.d. „Passaði ekki“ eða „Gölluð vara“ til innanhússnotkunar.

4. Skila á lager (Restock items)

Þetta skref ræður því hvort lagerstaðan þín uppfærist.

Ef varan er í lagi og þú ætlar að selja hana aftur, vertu viss um að haka við „Restock refunded items“. Þá hækkar lagerstaðan sjálfkrafa um það magn sem skilað var.

Ef varan er ónýt eða þarf að farga henni skaltu taka hakið af svo lagerinn hækki ekki.

Nú velurðu hvernig endurgreiðslan fer fram – sjálfvirkt eða handvirkt.

Valkostur A: Refund via Teya / Rapyd / Valitor (mælt með)

Ef pöntunin var greidd með korti í gegnum greiðslugátt sem styður endurgreiðslur sérðu hnapp eins og „Refund via Teya“.

1. Veldu magn og upphæð samkvæmt skrefum hér að ofan.
2. Smelltu á „Refund via …“ hnappinn.
3. Kerfið sendir beiðnina í greiðslugáttina og peningurinn fer sjálfkrafa til baka á kort viðskiptavinarins.

Þú þarft ekki að fara inn í heimabanka eða gáttina sjálfa – allt gerir þú úr pöntuninni.

Valkostur B: Refund manually (handvirk endurgreiðsla)

Notaðu þetta aðeins þegar þú hefur þegar skilað peningnum handvirkt – t.d. með millifærslu í heimabanka, eða þegar greitt var með millifærslu í upphafi.

Hnappurinn „Refund manually“ uppfærir bara stöðuna og bókhald pöntunarinnar í WooCommerce – hann hreyfir ekki raunverulegt fé.

Bókhald – kreditreikningar

Ef þú ert með tengingu við Payday, DK eða Reglu ætti endurgreiðslan að búa til kreditreikning sjálfkrafa í bókhaldskerfinu þegar þú klárar ferlið hér að ofan. Það er gott að fylgjast sérstaklega með fyrstu skiptin og kíkja í bókhaldið til að staðfesta að kreditreikningurinn hafi skilað sér rétt.